朝早出門熱到成身汗，返到公司又即刻俾冷氣凍到起雞皮，坐咗一日之後開始頭痛、鼻塞、周身骨痛，仲成日覺得攰同冇胃口，係咪好熟悉？香港七月天文台接連發出高溫警告，好多打工仔為咗避暑成日匿喺冷氣房，一熱一凍嚟嚟去去，身體最受唔住。中醫認為呢種室內室外溫差太大引致嘅不適，統稱「冷氣病」，多數同寒邪、濕邪困住體表同脾胃有關——「陽氣不得宣發，寒濕內侵」，透過湯水食療溫中散寒、健脾袪濕，正正可以幫助紓緩呢種都市常見嘅冷氣病困擾。 冷氣病其實唔係正式病名，而係一種因為長期處於低溫冷氣環境，加上出入冷熱溫差太大所引發嘅一組不適症狀統稱。常見表現包括頭痛、頸梗膊痛、鼻敏感發作、手腳冰冷、腸胃唔舒服同精神疲倦，症狀好似感冒但又唔完全一樣。中醫角度睇，冷氣令毛孔閉塞、汗液排唔出，寒濕之邪困喺體表甚至脾胃，日子耐咗就會令陽氣受損、抵抗力下降。 中醫驅寒袪濕嘅「薑陳組合」 生薑性溫味辛，歸肺、脾、胃經，主打溫中散寒、發汗解表，係中醫處理風寒感冒同手腳冰冷嘅常用食材。現代研究指生薑含有薑辣素（gingerol）成分，有助促進血液循環，紓緩因受寒引致嘅頭痛同肌肉繃緊。...