訓喺張床輾轉反側幾個鐘都瞓唔著，成個人焗到出晒汗，心仲跳得好快好唔安樂，好唔容易眼瞓返又俾蚊叮醒，第二日返工成個人都冇晒精神，係咪好熟悉？香港踏入盛夏，日頭又長又焗，就算開住冷氣，好多人都會發現自己特別難入睡，成晚扎醒好幾次。中醫認為呢種因為暑熱引致嘅難眠，多數同「心火旺」有關——心主神明，夏氣通於心，暑熱最易擾動心神，透過湯水食療清心安神、養陰生津，正正可以幫助紓緩呢種夏夜常見嘅失眠困擾。 夏夜失眠同一般失眠唔完全一樣。除咗天氣悶熱直接影響瞓眠質素，中醫角度嚟睇，夏天屬火，五臟入面心對應夏氣，暑熱之邪最易由外而內擾動心神，令人心煩意亂、難以入睡，甚至瞓着咗都容易發夢、半夜扎醒。長期捱夜、精神緊張仲會令陰液耗損，形成「陰虛火旺」，令失眠情況雪上加霜，出現口乾、心悸、盜汗等徵狀。 中醫清心安神嘅「蓮百組合」 蓮子性平味甘澀，歸心、脾、腎經，主打養心安神、健脾止瀉，係中醫處理心煩失眠嘅常用食材。現代研究指蓮子含有蓮子鹼等成分，有助鎮靜神經、幫助放鬆入睡。 百合性微寒味甘，歸心、肺經，功效係養陰潤肺、清心安神，同蓮子相配，一補一清，特別啱畀成日心煩氣躁