朝早訓醒對眼腫到好似打咗一鑊咁，行到黃昏對腳仲腫到啲鞋都著唔落，係咪好熟悉？香港人成日外賣快餐、湯麵米線輪流食，一餐嘅鈉質分分鐘已經超標，加上返工成日坐足八個鐘，下肢血液循環自然變差。中醫認為呢種成日腳腫眼腫嘅情況，多數同「脾虛濕困」有關——「脾主運化水液，脾虛則水濕內停」，透過湯水食療健脾利水，正正可以幫助紓緩呢種困擾好多都市人嘅水腫問題。 水腫同肥胖唔同，可以用「1秒測試法」按壓小腿皮膚，如果凹陷位置唔即刻回彈就代表有水腫。水腫成因好多，除咗久坐久站令下肢靜脈回流變差，飲食過鹹、經期前黃體素上升、缺乏運動甚至藥物副作用都可能引致。中醫角度嚟睇，水腫多屬「脾虛濕盛」，脾胃運化水液嘅功能失調，令水濕停聚喺體內排唔出，就會出現手腳浮腫、眼瞓腫脹、身體沉重等症狀。 中醫健脾利水嘅「赤薏組合」 赤小豆性平味甘酸，歸心、小腸經，主打利水消腫、解毒排膿，祛濕力強，係中醫食療處理水濕停聚引致水腫嘅常用食材，不過藥性較強，唔建議自己胡亂加大分量。 薏米（薏苡仁）性涼味甘淡，歸脾、胃、肺經，功效係健脾滲濕、利水消腫，同赤小豆相配，一利一健，特別啱畀成日腳腫眼腫、